Hemen aurki ditzakezu IDEKOri buruzko azken berriak
Zentro teknologikoak, kongresuaren babesle izateaz gain, parte hartze nabarmena izango du batzorde eta programa zientifikoan, sei aurkezpenekin.
Ikerketa aplikatuarekin, ezagutzaren transferentziarekin eta industria-sarearekin lankidetzan duen konpromisoaren barruan, IDEKOk parte-hartze aktiboa izango du Fabrikazio Aurreratuaren eta Makina-Erremintaren 24. Kongresuan, urriaren 29tik 31ra Donostian egingo dena.
Basque Research and Technology Alliance (BRTA) aliantzako kide den zentro teknologikoak, Kongresuaren zilarrezko babesle gisa, paper nabarmena izango du bai batzorde zientifikoan bai programa teknikoan ere.
Alde batetik, Jokin Muñoa, IDEKOko zuzendari zientifikoa, kongresuko
batzorde zientifikoko parte da, eta IDEKOren bozeramaile gisa, fabrikazio
aurreratuaren sektorerako teknologia berritzaileak garatzen dituen zentro
erreferente gisa.
Bestetik, IDEKOko ikertzaileek sei ponentzia tekniko egingo dituzte, industria-produkzio eraginkorrago eta efizienteagoa lortzera bideratutako irtenbideak partekatuz.
Biki digitalak, bibrazioak eta robotika
Aurkezpenetan garapen aurreratuak erakutsiko dira, hala nola pareta meheko piezen 5 ardatzeko fresaketarako biki digitala, doitasuna eta egonkortasuna hobetzeko helburuarekin; tresna lerdenen mozketa-gaitasuna hobetzeko euskarri sintonizagarri integratua; eta ultrasoinuen bidezko ikuskapen-sistema berritzailea, geometria eta material konplexuen kontrolerako diseinatua.
Era berean, IDEKOk aleazio arinen fresaketa robotikoan autoinduzitutako bibrazioak ezabatzeko azken emaitzak aurkeztuko ditu; dinamika handiko CroXY gida gurutzatuak dituzten portiko motako makinen diseinua; eta doitasun ingeniaritzaren eta metrologia aurreratuaren arloan garatutako irtenbide berriak, ekoizpen jasangarri eta akatsik gabeko sistementzat.
Zentroak, gainera, errendimendu handiko robotei buruzko lan bat ere aurkeztuko du, haien diseinuan, simulazioan eta kalibrazioan oinarritua, fabrikazio aurreratuan efizientzia eta fidagarritasuna hobetzeko helburuarekin.
Euskararekiko konpromisoa
Aurtengo edizioan, IDEKOren sei aurkezpenetatik bi euskaraz egingo dira, zentroak euskararen sustapen eta normalizazioarekiko duen konpromisoaren erakusgarri.
Ekimen honek berresten du zientzia eta teknologia arloetan euskararen erabilera sustatzeko apustua, industria-foro espezializatuetan modu natural eta integratuan txertatuz.
Fabrikazio Aurreratuaren eta Makina-Erremintaren Kongresua (Manufacturing Congress), AFM Cluster-ek antolatua eta sektoreko topagune nagusi nazionaltzat jotzen dena, hiru egunetako jardunalditan zehar profesionalak, ikertzaileak eta enpresa liderrak bilduko ditu, fabrikazio aurreratuaren eta makina-erremintaren erronkak eta aukerak ikuspegi global batetik aztertzeko.
Ikerketa zientifikoa, digitalizazio industriala, jasangarritasuna,
zibersegurtasuna eta fabrikazioan aplikatutako adimen artifiziala izango dira
aztertuko diren gai nagusietako batzuk. Hitzaldien artean, Marc Vidal, Genís
Roca eta Jon Sistiaga bezalako hizlari erreferenteek industriaren etorkizunari
buruzko ikuspegi aurrerakoia eskainiko dute.
Programa osoa hemen dago eskuragarri: https://www.manufacturingcongress.com/
.jpg)
