ESKATU INFORMAZIOA

 
BERRIAK

Hemen aurki ditzakezu IDEKOri buruzko azken berriak

Zero akatseko fabrikazioan kalitatea osorik tratatzeko teknologia digitalak

Zero akatseko fabrikazioan kalitatea osorik tratatzeko teknologia digitalak
  • InterQ proiektu europarrak plataforma digital bat garatu nahi du datuen sorkuntza eta kudeaketa integralerako, produktuen eta prozesuen kalitatea bermatzeko zero akatsen fabrikazio-paradigmaren pean.
  • Ekimenak biki digitalen belaunaldi berri bat eraikitzea eta adimen artifizialeko sentsoreak eta algoritmoak erabiltzea aurreikusten du, sektore giltzarrien eraginkortasuna handitzeko, hala nola, aeronautikoa, energetikoa edo automobilgintza.
  • IDEKO zentro teknologikoa buru dela, proiektuan Europako 11 herrialdetako 25 bazkidek parte hartzen dute. Horien artean, nabarmentzekoa da ITP, Gamesa Energy Transmisión, Danobat, Aeromec, Tekniker eta UPV/EHU Euskal Herriko Unibertsitateak osatzen duten euskal partaidetza zabala.     

Industria-fabrikazioko prozesuen eta ekipoen kalitatearen erabateko kontrola lortzea, zero akatsen fabrikaziorantz aurrera egiteko, funtsezko erronka da sektore ekonomiko estrategikoetan, hala nola, aeronautikoan, energian edo automobilgintzan.

IDEKO euskal teknologia-zentroa buru duen InterQ proiektu europarraren ardatza plataforma digital bat garatzea da, ekipoetatik datozen datuen sorkuntza eta kudeaketa integralerako, produktuen eta prozesuen kalitatea bermatu ahal izateko, akatsik gabeko fabrikazioaren paradigma optimizatzeko helburuarekin.

Gaur egun, baliabide digitalei esker, datu-bolumen handia sortzen eta biltegiratzen da, baina prozesatzeko eta kudeatzeko teknologia egokirik gabe, ezin da informazio zehatz, fidagarri, seguru eta garrantzitsurik sortu, industria-prozesuen eraginkortasuna eta kalitatea handitzeko.

"InterQ plataformak arazo horri erantzun nahi dio. Zero akatsik gabeko fabrikazio-prozesuak optimizatzeko datuen tratamenduan oinarritutako irtenbide bat da, kalitatea balio-kate osoan zehar arakatu ahal izateko", esan du Jokin Muñoa ekimenaren koordinatzaileak.

Zero akatseko fabrikaziorako bost moduluz osatutako plataforma

Plataforma bost modulutan banatuko da, kalitatearen kudeaketa integrala ahalbidetzeko. InterQ-Process da horietako lehena, eta fabrikazio-prozesuen kalitatearen monitorizazioan oinarrituko da. Ondoren, InterQ-Product, produktuaren kalitatea kontrolatuko duena. Hurrengoa InterQ-Data da, araututako datuen kalitatea ebaluatzeko. Laugarrena InterQ-ZeroDefect da, eta adimen artifiziala aplikatuz fabrikazioaren kalitatea hobetzea du helburu, datu fidagarri eta garrantzitsuekin elikatuta. Azkenik, InterQ-TrustedFrameworkek produktuaren trazabilitate osoa bermatuko du, balio-katearen zatiei zuzendua, erregistro banatuko teknologiak aplikatuz (Distributed ledger Technology).

InterQ-Process moduluaren barruan, soluzioa gai izango da fabrikazio-prozesuaren kalitatea neurtzeko, aurreikusteko eta kontrolatzeko, sentsore birtualen eta biki digitalen belaunaldi berri baten bidez. Prozesuaren datu garrantzitsuak lortu nahi dira, ebaketa-puntutik oso gertu neurtzeko gai diren osagaien belaunaldi berri baten bidez eta magnitude horiek Inteligentzia Artifizialeko eta Machine Learningeko algoritmoen bidez iragartzea ahalbidetzen duten sentsore birtualen bidez.

Proiektuak ikuspen artifizialeko azken teknikak eta sentsore optiko eta magnetikoak aplikatzea sustatzen du, InterQ-Product moduluaren barruan, gainazaleko topografiaren kalitatea eta piezaren gainazaleko osotasuna neurtzeko. Produktuaren azken iragarpenera bideratutako biki digitalen garapenak sistema horiek osatuko ditu.

Balio-katearen eraginkortasuna handitzeko aukera

Ziurgabetasun handiko testuinguru batean, InterQk Euskadiko industria-ingurunearen lehiakortasuna sustatzen lagunduko du, teknologia digitalek eta adimen artifizialak eskaintzen dituzten aukerak txertatuz.

Aurtengo azaroan hasi zen proiektua, eta 2023ra arte iraungo du. Europako 11 herrialdetako 25 bazkidek parte hartuko dute, besteak beste, Renault, Gamesa Energy Transmisión eta ITP enpresek. Danobat, Aeromec, Tekniker eta Euskal Herriko Unibertsitatea partzuergoko kide dira, besteak beste.

Ekimenak 11 milioi euroko aurrekontua du, eta horietatik 9 EBk finantzatuko ditu Horizon 2020 ikerketa eta berrikuntza programaren bidez. Europako finantzaketaren %30 Euskadiko enpresa eta zentro teknologikoentzat izango da.

"Parte hartzen duten makina-fabrikatzaileentzat, proiektu hau aukera paregabea da makinen eta prozesuen garapen digitalerako, azken piezaren kalitatearen erabateko kontrola bilatuz", ondorioztatu du Muñoak.


NABARMENDUTAKO BERRIAK

KATEGORIAK