ESKATU INFORMAZIOA

 
BERRIAK

Hemen aurki ditzakezu IDEKOri buruzko azken berriak

IDEKOk adimen artifiziala eta doitasuna jarri ditu datozen 4 urteetarako lehentasunezko ardatz

IDEKOk adimen artifiziala eta doitasuna jarri ditu datozen 4 urteetarako lehentasunezko ardatz
  • Plan estrategiko berriaren esparruan, zentro teknologikoak hurrengo laurtekoan aurre egingo dien ikerketa erronkak zehaztu ditu.
  • Biki digitalek, fabrikazio gehigarriak, robotikak, osagai aktibo eta adimendunek eta sektore estrategikoetarako fabrikazio prozesuek osatzen dute lehentasunezko eremuen zerrenda.
  • Identifikatutako lerro guztiek ingurumenaren iraunkortasunaren ikuspegia eta ekonomia zirkularraren printzipioak jasoko dituzte.

Fabrikazioaren eraldaketei aurrea hartzeko eta industriaren beharrei erantzuteko, IDEKO zentro teknologikoak datozen lau urteetarako ikerketa plan berria ezarriko duten ildo estrategikoak zehaztu ditu.

Zehazki, Fabrikazio Aurreratuan espezializatutako eta BRTA Aliantzako kide den erakundeak manufacturing-ari aplikatutako adimen artifiziala, doitasun makinak eta prozesuak, simulazioa eta biki digitalak, osagai aktiboak eta adimendunak, pieza eta sektore estrategikoetarako prozesuak, robotika eta fabrikazio gehigarria jarri ditu hurrengo laurtekoan lehentasunez aurre egin beharreko zazpi ikerketa erronka gisa. Zeharka bada ere, erronka horiek guztiek ingurumenaren iraunkortasunaren ikuspegia eta ekonomia zirkularraren printzipioak txertatuko dituzte.

“Gure sektorearen ingurumen inpaktua beste arlo batzuena baino txikiagoa da, hala nola, industria kimikoarena edo altzairutegiena, baina ingurumena zaintzeko sentsibilitate handia dugu, eta zazpi erronketako bakoitzean iraunkortasunari eta ekonomia zirkularrari lotutako helburuak definituko dira. Lehengai gutxiago kontsumitzen duen mekanizazio prozesu bat garatzeko gai bagara, gure bezeroen kostuak murrizten ariko gara, baita karbono aztarna ere”, azaldu du Rafa Lizarralde IDEKOko ikerketa zuzendariak.

IDEKOren Plan Estrategiko berriaren esparruan garatua, erakundearen ikerketa planak bezeroen lehiakortasuna areagotuko duten irtenbideak sortu nahi ditu, negozio lerro berriak eta balio kateko eragile berriengana hurbiltzeko aukera emango duten produktuak sortuko dituzten teknologiak.

“Funtsean, gure bezeroen makina eta sistemetan integratuko diren teknologiak garatu nahi dira, gehiago eta hobeto fabrikatu ahal izateko. Bigarrenik, negozio berriak sor ditzaketen teknologiak sortu nahi ditugu, eta, azkenik, bezero berriengana hurbildu nahi dugu. Garatzen dugun guztia gure bezeroak lehiakorragoak izan daitezen da, teknologikoki diferentzialak diren elementuen bitartez", zehaztu du Lizarraldek.

Aukera berriak, giza kapitala eta espezializazioan arreta jartzea

IDEKOren ikerketa plan berriak fabrikazio aurreratuaren espezializazioan sakontzen du, baina berrikuntzak ditu etorkizuneko erronkei erantzuteko eta eraginkortasunak markatutako irtenbideak eskaintzeko.

"Plan honek jarraipena ematen dio fabrikazio industrialerako teknologia aurreratuak garatzeko dugun bokazioari; izan ere, gure arrakastaren arrazoietako bat da manufakturingeko gure espezializazioan etengabeak izan garela, baina berrikuntza garrantzitsu bat du: zeharkako erronkak definitzea, diziplina anitzeko taldeak sortzen ari garenontzat, esparru desberdinetako profesionalak foku komun batean pentsatzen eta lan egiten jartzeko asmoz. Ikuspegi berri horrekin, gure helburua da eraginkorragoak izatea ezagutza sortzeko eta merkatura transferitu daitezkeen irtenbideak garatzeko, ikerkuntzan bikaintasuna lortzeko”, Lizarralderen esanetan.

Lehentasunezko ardatzen aukeraketa bat dator administrazio publikoen eta, bereziki, Eusko Jaurlaritzaren estrategia teknologikoarekin: “Euskal Administrazioa kontuan hartzen dugu gure ikerketa planean. Hautatzen ditugun teknologiek zentro gisa eboluzionatzen eta hazten laguntzen digute, baina Euskadiko errealitateari ere begiratzen diote eta industria sareari ekarpen bat egitea bilatzen dute”, Lizarraldek gaineratu duenez.

Gainera, ikerketa-plan horrekin, IDEKOk garapenerako tresna propio bat izateaz gain, giza kapitala gaitzen eta industriara transferitzen ere laguntzen du.

“Gure planak, halaber, industriari eta merkatuari buruzko ikuspegia duten profesionalak prestatu nahi ditu, eta enpresara transferitzea erraztu. Makina-erremintari eta industria fabrikazioari buruzko prestakuntzan ari diren profesionalen pertzepzioaren bilakaera gertatzen ari da, digitalizazioari eta informazioaren eta komunikazioaren teknologiak, ikusmen artifiziala, robotika edo datuen analisia sartzeari esker. Belaunaldi berrien aldetik erakargarritasunaren eta interes teknikoaren pertzepzioan lekua berreskuratzen ari gara. Garatuko ditugun teknologiak erakargarriak dira une honetan prestatzen ari diren gazteentzat", arrazoitu du Ikerketa zuzendariak.

IDEKOren ikerketa-plan berriak inbertsioak egitea ere ekarriko du, saiakuntza banku eta laborategi gisa dituen gaitasunak indartzeko.

“Ez da inbertsio berezirik egin beharko, baina indartze inbertsioak egingo ditugu dagoeneko garen horretan aurrera egiteko, eta bereziki indartuko gara Adimen Artifizialaren esparruan; izan ere, orain arte izan ditugunak ez bezalako profil espezifikoekin indartuko den talde bat dugu, datu-analista eta matematikari gisa. Erreferentziazko erakundeekin aliantzak eta lankidetzak ere ezarriko ditugu, gure gaitasunak osatzeko", ondorioztatu du adituak.

NABARMENDUTAKO BERRIAK

KATEGORIAK