Gaur egungo egoera ekonomikoaren eta azken garaiotan nazioartean jasan dugun ekonomia krisi handienaren ondorioz, bai eta, besteren artean, globalizazioarengatik lehiakortasuna mundu mailan areagotu izanaren ondorioz ere, produktuen eta prozesuen berrikuntzaren inguruko eskaria hazi egin da. Aldi berean, ikerketara bideratutako finantzazioa murriztu dute gobernuek, eta, horren eraginez, nabarmen areagotu dira enpresen eta ikerketa erakundeen arteko lankidetza harremanak, bai estatu mailan, bai nazioartean. Eszenatoki horretan, lankidetza mota horrek herrialdeetako garapen ekonomiko eta industriala bultza dezakeela jakinik, ikerketa akademikoaren eta garapen teknologikoko jardueren artean loturak sortzea sustatuko duten politikak, pizgarriak eta legezko neurriak garatzen ari dira gobernuak. Horren guzti horren ondorioz, industri sektoreak eta ikertzaileek betebehartzat jotzen dituzte harreman mota horiek. Are, berrikuntza teknologiko askok daukate jatorria industria-sektorearen eta ikerketa erakundeen arteko lankidetza harreman eraginkorretan.