Makina bat gelditzen denean plantaren ekoizpen ahalmena kaltetuta geratzen da zuzenean. Ekoizpen ahalmenari gehien eragiten dioten matxuren artean daude makinaren transmisio mekanikoetako errodamenduen eta engranajeen akatsekin lotura dutenak. Monitorizazio egoki batek, makinaren haustura larriak ekidin ez ezik, errodamenduen aprobetxamendua optimizatu eta makinaren erabilgarritasuna areagotu ere egin ditzake. Artikulu honetan, errodamenduetan ohikoenak diren akatsen analisia egiten da, boladun errodamenduetako akatsen diagnostikorako erabili ditzaketen teknikak berrikusten dira, eta, azkenean, errodamenduen diagnostiko automatikorako tresna bat aurkezten da, zeinak aztertutako errodamenduaren egoera monitorizatzen eta diagnostikatzen uzten duen. Monitorizazio horren bitartez errodamenduetako akatsak detektatu daitezke hasierako fasetik, baita errodamenduaren bizitza baliagarriaren bukaerako fasera arteko bilakaera ikusi ere. Monitorizazioan sortzen den informazioa oso baliagarria da bai makinaren fabrikatzailearentzat bai makinaren azken erabiltzailearentzat. Izan ere, makinaren fabrikatzaileari diseinuan edota muntaketan gertatu daitezkeen akatsak zuzentzeko aukera ematen dio, eta makinaren azken erabiltzaileari, berriz, makinaren hausturak saihesten eta mantentze lanetarako geldialdiak planifikatzen uzten dio.